Ротари клубот Кочани – Виница почнува постапка за формирање на Драмска академија, в среда на 3 мај ќе биде одиграна претставата „Тунел“
Во малата сала на Мултикултурниот центар во Кочани, Ротари Клуб „Кочани – Виница“ одржа прес конференција на која присуствуваа актерите и режисерот на најновата претстава „Тунел”, Кристина Атанасова Арсова.

– Целта на оваа средба е да ве информираме за активностите на Ротари клуб Кочани-Виница. Славиме десет години од постоењето и затоа презедовме низа активности. Една од тие активности што сакаме да ви ја презентираме е премиерата на театарска претстава. Станува збор за аматерска театарска претстава под покровителство на Ротари клуб Кочани-Виница во соработка со Општина Кочани, со фондацијата за Локален развој од Штип, Ротари клуб Штип. Решението да оформиме театарска претстава има една цел, а тоа е да се оформи Драмска академија во Кочани“. Идејата е да ја подигнеме културата на повисоко ниво во нашиот град и да им помогнеме на младите надежни актери да ги остварат своите цели, рече Сашко Андонов, претседател на Ротари клуб „Кочани-Виница“.
-Ова е проект кој што произлезе од првичната соработка помеѓу Народниот театар од Штип, моите колеги актери со цел да ја подигнеме културата во градот. Нема да зборуваме за темата бидејќи сакаме да понудиме едно изненадување во среда на 3 Мај пред нашата публика. Нашата публика веќе подолго време нема гледано една ваква аматерска претстава со наши млади надежни актери од градот. Решивме да ја испровоцираме публиката и да дојде да ја погледне претставата. Темата е актуелна и нẻ засега сите бидејќи секојдневно се соочуваме со неа. Претставата ќе земе учество и на Драмскиот аматерски фестивал кој ќе се одржи од 22 до 27 Мај а потоа истата да биде претставена и ширум Македонија – истакна Кристина Атанасова – Арсова, режисер на претставата „Тунел“.
Андонов, меѓудругото истакна дека имаат доволно стручен и професионален кадар кој ќе даде поддршка и ќе работи со аматерите, со цел да се изградат нови професионалци и да се продуцираат квалитетни театарски претстави.
