Реконструираната кино сала при ЦК „Бели Мугри“ пуштена во употреба
На свеченост во НУЦК „Бели Мугри“ – Кочани вечерва беше пуштена во употреба реконструираната кино сала при националната установа, инвестиција вредна 20 милиони денари, средства обезбедени од Министерството за култура на Р. Македонија.
На свеченоста по повод пуштањето во употреба, в.д директорката на „Бели Мугри“, Ана Поп Михаилова пред присутните истакна дека со реконструкцијата салата доби нов современ изглед според сите светски стандарди и прописи.
-Во втората фаза од реконструкцијата која почна со реализација во 2021 та година опфатени се градежно – занатски работи, електрични и машински инсталации во кино салата, гремиорните и тоалетите позади сцената. Извршена е демонтажа на постоечките седишта во гледалиштето и на галеријата во гледалиштето, на ѕидните облоги и плафонот, комплет осветлување и грејни тела како и демонтажа на старите плочки и санитарии во тоалетите. Во аудиториумот изведен е спуштен плафон од огноотпорни гипс картон плочи, а на ѕидовите поставени се акустични облоги од перфорирани гипсени плочи. За современ изглед на салата на дел од ѕидовите поставени се облоги од фурнир. Поставена е нова армирана цеметна кошулка врз која е поставена исоко квалитетна облога од теписон. Монтирани се и нови влезни противпожарни двокрилни врати во аудиториумот, како и противпожарни врати на галеријата. Што се однесува до електричната инсталација, поставени се нови разводни ормари, пуштени се нови кабли во салата, како и нови светилки со интензитен на осветлување согласно со постоечките прописи и препораки. Поставена е и инсталација за противпожарна заштита, комплет со нова противпожарна централа и оптичко димени детектори. Од системот за климатизација кој се предвидува да биде со две клима комори изработени се и монтирани поцинкуваните канали за потис и отцис на воздух комплет со решетки и дифузери. Во гремиорните изработен е спуштен плафон со нови светилки, нови врати и ламинат на подот. Во тоалетите се поставени нови ѕидни и подни керамички и гранитни плочки, нов спуштен плафон, ПВЦ врати како и комплет нови санитарии. Во 2022 година набавени се и поставени седишта во аудиториумот и на галеријата. Вкупниот капацитет на салата по реконструкцијата изнесува 356 столици, истакна Ана Поп Михаилова, в.д директор на „Бели Мугри“.
Во првата фаза претходно беше реконструирана фасадата, кровот, двете проодни тераси како и дел од тоалетите и обновување на прозорците и вратите.
Во рамки свеченото отворање на реконструираната кино сала беше прикажан филмот „Преекспонирано“. На отворањето присуствуваа режисерот Елеонора Венинова, продуценот и монтажер Гоце Кралевски и актерот Благој Веселинов.
Од НУЦК „Бели Мугри“ најавија дека во следниот период следуваат кино проекции, културни настани, промоции, изложби и музички перформанси.
